HKEEren txostenen kalitate kontrola

HKEEk izena lortu du mamitu dituen Fiskalizazio txostenei dagokienez.

Kalitate hori eskuratzea ez da egiteko erraza izan. Txostenak dokumentu luzeak izan ohi dira, dati eta iritzi ugari jasotzen dituztenak eta horietan informazio kopuru handia erabili ohi da.

Auditore talde bakoitzak zehaztasunez aztertzen du txostenen edukia eta horien euskarriak. Hau guztia, ordea, ez da nahikoa.

Epaitegiak Kalitate Kontrola izenez ezagutzen den berme mekanismo bat bideratu du; bertan, beste aditu talde batek, txostenaren exekuzioan zerikusirik izan ez duenak, txostena egin duen taldearen lana berraztertzen du, behin-betiko onetsia izan aurretik beharrezko diren betekizun teknikoak dituela egiaztatzearren. Era honetara, azaleratu ez den zeinahi eratako hutsik txikiena ere izatea saihesten da eta txostena azken fasera igaroko dela bermatzen da, ondorio guztien euskarria behin egiaztatu ondoren.

Baldin eta talde txostengilearen eta kalitate kontrola egin duen taldearen artean desadostasunak baleude, Batzorde Teknikoan aztertuko dira eta bere horretan iraungo balute, behin-betiko Osokoak ebatziko ditu.

HKEEren Batzorde Teknikoa

HKEEren Osokoak bearrezko iritzi zion jardute atal tekniko eta kontsultiboaz hornitzeari, Epaitegiaren txosten guztiak Osoko bilkuran eztabaidatu eta onetsi aurretik aztertuko zituena.

Batzorde Tekniko hau Epaitegiaren Lehendakariak, Idazkari Nagusiak eta Auditore Buruek osatzen dute.

Horietako saio bakoitzean aztertzen denaz dagokion akta egiten da. Berebat, geroko txostenak idaztean aplikatu beharko diren irizpide orokorrak hartzea eragiten duten erabakien gaineko oharrak jasoko dira.

Alegazioak

Behin-behineko txosten hori, jada kalitate kontrola eta Batzorde Teknikoa gainditu eta Osokoak onetsi duena, fiskalizatutako erakundeei igorrik zaie.

Erakunde hauek Epaitegiak egindako oharpenen aurrean egoki iritzitako alegazioak aurkezteko epea daukate.

Behin alegazio horiek aztertu ondoren, auditore taldeak behin-betiko fiskalizazio txostena mamituko du, alegazio horiek onartu edo saihesten dituela, edo txostenean azaldu beharrekoak diren alderdiak adieraziaz edo txostena aldatuaz. Onartu ez diren alegazioak txostenaren testuari txertatuko zaizkio.

Txosten hau berriz aztertuko dute Batzorde Teknikoan eta HKEEren Osokoan, oraingoan behin-betiko txosten modura onetsia izateko.

HKEEren Lehendakariak izenpetutako fiskalizazio txostena Eusko Legebiltzarrari eta fiskalizazio-gai izan den erakundeari aurkeztuko zaio eta Euskal Herriko Aldizkari Ofizialera igorriko da argitaratua izan dadin.